Gjatë kësaj vizite, zëdhënësi i komunës së Tetovës, Flakran Pustina u takua me kryetarin e bashkisë së Shkodrës Lorenc Lluka i cili shprehu falënderimin e tij dhe të banorëve të përmbytur për komunën e Tetovës që përpos ndihmave materiale ka ndarë edhe ndihmë financiare në vlerë prej 30 mijë euro për qytetarët e vendeve të përmbytura në Shkodër.
Zëdhënësi i komunës së Tetovës, Flakran Pustina, gjatë dorëzimit të ndihmave humanitare, u shpreh se kjo është iniciativë e kryetarit të komunës së Tetovës Prof. Dr. Sadi Bexheti për të ndihmuar sado pak qytetarët e Shkodrës. Pustina gjithashtu falënderoi të gjithë qytetarët e Tetovës, afaristët dhe biznesmenët që përkrahën këtë iniciativë.

Zëdhënësi i komunës së Tetovës u takua me zëdhënësin e komunës së Shkodrësa, Ridvan Dibra i cili bëri pranimin e ndihmave humanitare dhe e shoqëroi delegacionin gjatë gjithë vizitës në Shkodrës.

Delegacioni i komunës së Tetovës, gjatë vizitës në vendet e përmbytura në Shkodër u takua edhe me Kryetaren e Parlamentit të Shqipërisë, Jozefina Topalli. Topalli falënderoi përzemërsisht kryetarin e komunës së Tetovës Prof. Dr. Sadi Bexheti dhe të gjithë ata që kontribuuan për të ndihmuar Shkodrën. Sipas Topallit, ky gjest i komunës së Tetovës tregon për solidaritetin që ka ekzistuar gjithnjë tek shqiptarët.

Aksioni i komunës së Tetovës, për dërgimin e ndihmave humanitare për qytetarët e Shkodrës vazhdon, dhe të gjithë të interesuarit mund të donojnë ndihmat e tyre te Stacioni i Njësitit kundër zjarrit në Tetovë.