Ambasadori i SHBA-ve në Shkup Filip Ryker, deklaroi me këtë rast se këndi amerikan në Tetovë po rritet dhe zgjerohet me një shpejtësi të paparashikuar. “Ky kënd si pjesë e programit gjithëpërfshirës me audiencën dhe arritjet ka treguar ngritje të mirë gjatë këtij viti. Këndi amerikan në Tetovë vazhdon të jetë këndi me rritje më të shpejtë në botë, dhe ju uroj shumë për punën që bëni”, tha ambasadori Ryker.

Në emër të kryetarit të komunës së Tetovës, Prof.Dr. Sadi Bexhetit, të pranishmit i përshëndeti Shefi i kabinetit, Alajdin Asani. Duke shprehur përgëzimet dhe urimet e sinqerta me rastin e kremtimit të dyvjetorit të themelimit të Këndit Amerikan në Tetovë, Asani theksoi se Komuna e Tetovës është në partneritet me Këndin Amerikan në Tetovë, me këtë vatër të miqësisë, e cila brenda dy vitesh nëpërmjet organizimeve të shumta ka hapur horizontin e dialogut mes qytetarëve të Tetovës dhe popullit amerikan. “Ne jemi të lumtur që agjenda e ngjeshur e këndit, përçon në qytetin e Tetovës frymën e miqësisë, të njohjeve dhe të dialogut. Komuna e Tetovës, si partnere me Këndin Amerikan në Tetovë, do të jetë pranë këtyre aktiviteteve dhe pranë misionit fisnik të këndit për të promovuar kohën e miqësisë dhe frymën e bashkëpunimit të gjithanshëm”, tha Asani.